Kryeministri i Shqipërisë, Edi Rama, reagoi ashpër ndaj Partisë Demokratike pas protestës së mbrëmshme përpara Kryeministrisë dhe Kuvendit në Tiranë, e cila u shoqërua me përplasje të dhunshme dhe 21 persona të lënduar, mes tyre 19 efektivë policie.
Rama akuzoi opozitën se qëndron pas sulmeve me kokteje molotovi dhe mjete piroteknike, duke i cilësuar ato si “armë me kapacitet vdekjeprurës”. Në një reagim publik, ai deklaroi se policët janë sulmuar dhe plagosur me mjete shpërthyese të improvizuara, për të cilat kërkoi hetim të plotë dhe ndëshkim të përgjegjësve.
Shefi i qeverisë kërkoi nga institucionet e drejtësisë të garantojnë llogaridhënie për të gjithë ata që hodhën mjete të rrezikshme dhe sende të forta ndaj forcave të rendit, duke theksuar se dhuna nuk mund të justifikohet me arsye politike.
Sa i përket përballjes politike, Rama theksoi se ajo do të zhvillohet në zgjedhjet e vitit të ardhshëm, duke shprehur bindjen se shumica do të konfirmohet sërish në votime dhe se qeveria do të vazhdojë rrugën drejt integrimit evropian.
Ndërkohë, Ministria e Shëndetësisë njoftoi se nga përplasjet janë lënduar 21 persona – 19 policë, një deputet i opozitës dhe një qytetar. Shumica e të lënduarve kanë pësuar djegie në gjymtyrë.
Ministria e Brendshme bëri të ditur se 19 persona janë shoqëruar në polici, përfshirë katër të mitur, ndërsa hetimet vijojnë për identifikimin e personave të tjerë të përfshirë në incidentet e dhunshme.
