Trent Alexander-Arnold zyrtarisht te Real Madrid nga 1 Qershori, pas marrëveshjes me Liverpoolin
Trent Alexander-Arnold do të bëhet zyrtarisht lojtar i Real Madridit të dielën, më 1 qershor, pasi Liverpool ka pranuar një shumë për të liruar mbrojtësin nga kontrata e tij para përfundimit të afatit.
Burime pranë Liverpoolit kanë bërë të ditur se tarifa e marrëveshjes është 10 milionë euro (rreth 8.4 milionë paund), të cilat Real Madrid i ka paguar menjëherë dhe në një këst të vetëm. Megjithatë, burime nga klubi spanjoll pretendojnë se shuma e paguar ka qenë më e ulët.
Marrëveshja është arritur për të lejuar mbrojtësin e djathtë të Anglisë të bashkohet me Real Madridin në kohë për të marrë pjesë në Kupën e Botës për Klube.
26-vjeçari do të kishte qenë i lirë të largohej nga Liverpooli më 30 qershor, kur kontrata e tij aktuale do të kishte skaduar.
Alexander-Arnold, i cili kishte konfirmuar më herët gjatë këtij sezoni se do të largohej në verë, ka nënshkruar një kontratë gjashtëvjeçare me madrilenët, me një klauzolë largimi prej 1 miliard eurosh (rreth 840 milionë paund).
FIFA ka miratuar një dritare shtesë transferimesh për këtë verë, nga 1 deri më 10 qershor, për të lejuar regjistrimin e lojtarëve të rinj për versionin e zgjeruar të Kupës së Botës për Klube, e cila do të zhvillohet në Shtetet e Bashkuara nga 14 qershori.
Ndeshja e parë e Realit në grup do të jetë më 18 qershor kundër skuadrës saudite Al-Hilal, në Miami.
Përpara kësaj, Alexander-Arnold mund të shtojë paraqitje të tjera në fanellën e Anglisë, pasi është përfshirë në listën e lojtarëve për ndeshjen kualifikuese të Botërorit ndaj Andorrës më 7 qershor, si dhe për miqësoren ndaj Senegalit më 10 qershor.
Alexander-Arnold ka qenë pjesë e Liverpoolit që nga mosha gjashtëvjeçare, kur iu bashkua akademisë si djalosh nga qyteti i tij i lindjes.
Me “The Reds”, ai ka fituar dy tituj të Premier League, Ligën e Kampionëve, Kupën e Botës për Klube nga FIFA, Superkupën e UEFA-s, Kupën FA dhe Kupën e Ligës.
Më herët këtë muaj, ai deklaroi se kishte vendosur të largohej për të përjetuar një “sfidë të re” dhe për t’u zhvilluar “personal dhe profesionalisht”.
Alexander-Arnold largohet nga Liverpooli me një rekord prej 23 golash dhe 92 asistimesh në 354 paraqitje për klubin.
Ai do t’i bashkohet në Madrid bashkëkombësit të tij, Jude Bellingham, si dhe ish-mesfushorit të Liverpoolit dhe Real Madridit, Xabi Alonso.
Alonso, 43 vjeç, ka pasuar Carlo Ancelottin në krye të Real Madridit, pasi klubi spanjoll për herë të parë që nga sezoni 2020–2021 nuk arriti të fitojë asnjë trofe të madh kombëtar apo evropian.
