Xhamia Al-Aksa në Jerusalem është rihapur pas 40 ditësh mbylljeje të vendosur nga autoritetet izraelite, duke i dhënë fund një prej kufizimeve më të rrepta të viteve të fundit. Sipas mediave ndërkombëtare, besimtarët u mblodhën në numër të madh që në orët e para të mëngjesit, menjëherë pas heqjes së ndalesave.
Që nga 28 shkurti, autoritetet izraelite kishin ndaluar hyrjen e myslimanëve palestinezë në zonën e Jerusalemit Lindor të pushtuar, duke shkaktuar një mbyllje të plotë të një prej vendeve më të shenjta të Islamit – një situatë e paprecedentë që nga viti 1967.
Gjatë kësaj periudhe nuk u lejuan përjashtime, as në muajin e Ramazanit dhe as gjatë festës së Fitër Bajramit, duke shtuar tensionet dhe reagimet në rajon.
Ndërkohë, autoritetet izraelite kishin vendosur kufizime edhe për vendet e shenjta të krishtera në Qytetin e Vjetër, përfshirë Kishën e Varrit të Shenjtë, ku besimtarëve u ishte ndaluar pjesëmarrja në festimet e Pashkëve për shkak të situatës së sigurisë dhe konfliktit me Iranin.
