Çmimet e naftës u rriten ndjeshëm këtë të martë, duke vijuar trendin rritës të seancës paraprake, ndërsa përshkallëzimi i tensioneve në Lindjen e Mesme dhe kërcënimet e reja për lundrimin në Ngushticën e Hormuzit kanë rritur shqetësimet për ndërprerjen e furnizimeve globale. Deklarata e Iranit për mbylljen e kësaj pike kyçe strategjike ka tronditur tregjet energjetike, ku Azia pritet të goditet më rëndë nga ky bllokim.
Situata në tregjet ndërkombëtare: Nafta Brent: Çmimi i referencës ndërkombëtare arriti në 79.80 dollarë për fuçi, një rritje prej 2.1% krahasuar me mbylljen e kaluar prej 78.15 dollarësh. Gjatë tregtimit të pikut, çmimi preku edhe vlerën prej 82.37 dollarësh, niveli më i lartë që nga janari 2025. Nafta WTI (Amerikane): U rrit me 2.1% duke arritur në 72.85 dollarë për fuçi, krahasuar me 71.33 dollarë në seancën e kaluar.
Kërcënimet nga Irani Rritja e fundit erdhi pasi Korpusi i Gardës Revolucionare Islamike të Iranit (IRGC) njoftoi se Ngushtica e Hormuzit është e mbyllur për tranzit dhe paralajmëroi se çdo anije që tenton të kalojë do të sulmohet.
Gjeneral Brigadieri Ebrahim Jabbari, këshilltar i lartë i komandantit të IRGC-së, deklaroi në televizionin shtetëror iranian se Teherani nuk do të lejojë kalimin në këtë rrugë ujore strategjike si përgjigje ndaj sulmeve të SHBA-së dhe Izraelit. “Ngushtica e Hormuzit është e mbyllur. Do të sulmojmë dhe do t’i vëmë flakën çdo anijeje që tenton ta kalojë,” deklaroi Jabbari, duke shtuar se Irani nuk do të lejojë “asnjë pikë nafte” të largohet nga rajoni.
Ekspertët paralajmërojnë se nëse bllokada vazhdon, çmimet e naftës mund të arrijnë shifra treshifrore (mbi 100 dollarë).
Reagimi i SHBA-së Sekretari Amerikan i Shtetit, Marco Rubio, mbrojti sulmet ajrore të përbashkëta SHBA-Izrael që nisën më 28 shkurt, duke argumentuar se ekzistonte një “kërcënim i menjëhershëm” nga Irani dhe kapacitetet e tij raketore. Rubio siguroi gazetarët se SHBA do të marrë masa për të zbutur kostot e larta të energjisë që vijnë nga kjo krizë.
Analistët parashikojnë që tregjet të mbeten tejet të ndjeshme ndaj zhvillimeve gjeopolitike, ndërsa paqëndrueshmëria pritet të vijojë. Izraeli dhe SHBA uzhvilluan sulme ajrore të koordinuara ndaj Iranit më 28 shkurt, duke përshkallëzuar bllokimin e tensionuar.
