Euroambasadori në Shkup, Mihalis Rokas, ka përsëritur qëndrimin e Bashkimit Evropian se e ardhmja e Maqedonisë së Veriut është brenda familjes evropiane, por ka theksuar qartë se përparimi në procesin e integrimit varet nga zbatimi i zotimeve të marra në vitin 2022.
Ai nënvizoi se BE-ja mbetet e gatshme të mbështesë institucionet e vendit në rrugën drejt anëtarësimit, por theksoi se ndryshimet kushtetuese dhe respektimi i marrëveshjeve të arritura në kuadër të kornizës negociuese janë thelbësore për hapjen e kapitujve të negociatave. Sipas tij, mesazhi i liderëve evropianë që kanë vizituar vendin kohët e fundit ka qenë i njëjtë: dera është e hapur, por përgjegjësia për hapat e radhës i takon Shkupit zyrtar.
Deklaratat e Rokasit vijnë në një periudhë stagnimi në procesin eurointegrues, ndërsa nga Brukseli pritet intensifikim i përpjekjeve për përmbushjen e kushteve të vendosura. Në anën tjetër, Qeveria ka përsëritur se ndryshimet kushtetuese nuk do të realizohen pa garanci të qarta se procesi i integrimit nuk do të shoqërohet me bllokada të reja apo kushte shtesë dypalëshe.
Procesi mbetet i bllokuar për shkak të kontestit me Bullgarinë, ndërsa ndryshimet kushtetuese, që përfshijnë përfshirjen e bullgarëve dhe komuniteteve të tjera në Kushtetutë, kërkojnë shumicë prej dy të tretash në Kuvend. Negociatat me BE-në nuk do të vazhdojnë pa përmbushjen e këtij kushti.
Maqedonia e Veriut nisi zyrtarisht bisedimet qasëse më 19 korrik 2022, me mbajtjen e konferencës së parë ndërqeveritare, pas miratimit të propozimit francez në Kuvend. Megjithatë, pa zbatimin e plotë të zotimeve të asaj periudhe, rruga drejt hapjes së kapitujve mbetet e pasigurt.
