Bashkimi Evropian duhet të përshpejtojë reformat dhe të heqë pengesat që e mbajnë të fragmentuar tregun e tij financiar, nëse synon të shndërrohet në një gjigant të vërtetë global. Kështu deklaroi Presidentja e Komisionit Evropian, Ursula von der Leyen, duke theksuar se kompanitë evropiane kanë nevojë urgjente për kapital për t’u zgjeruar dhe për të rritur konkurrueshmërinë.
Ajo e cilësoi sistemin aktual financiar të BE-së si tepër të copëzuar, duke nënvizuar se ndryshe nga Shtetet e Bashkuara, që funksionojnë me një sistem të unifikuar financiar, Evropa ka dhjetëra struktura të ndryshme dhe qindra vende tregtimi. Sipas saj, krijimi i një tregu të përbashkët kapitali, të madh dhe likuid, është thelbësor për të zvogëluar fragmentimin dhe për të fuqizuar ekonominë e bllokut.
Komisioni Evropian ka propozuar thjeshtimin e rregullave kombëtare me qëllim krijimin e një bashkimi të kursimeve dhe investimeve, duke lehtësuar qasjen e bizneseve në financim. Megjithatë, përpjekjet për harmonizimin e rregullave financiare në të kaluarën kanë hasur në vështirësi për shkak të dallimeve mes shteteve anëtare. Von der Leyen u bëri thirrje ligjvënësve që të veprojnë pa vonesa, duke paralajmëruar se në mungesë të konsensusit të plotë, disa vende mund të ecin përpara përmes mekanizmit të bashkëpunimit të zgjeruar.
Një tjetër pikë kyçe e propozimeve është forcimi i avantazhit evropian në sektorët strategjikë, për t’u dhënë kompanive të BE-së mbështetje më të madhe përballë konkurrencës së huaj. Ajo theksoi se Evropa duhet të rrisë prodhimin brenda kontinentit dhe njëkohësisht të zgjerojë rrjetin e partnerëve të besueshëm ndërkombëtarë.
Në këtë kuadër, ajo përmendi edhe rëndësinë e marrëveshjeve tregtare të reja, pas atyre me Mercosur-in dhe Indinë, duke paralajmëruar negociata dhe marrëveshje të ardhshme me Australinë, Tajlandën, Filipinet dhe Emiratet e Bashkuara Arabe.
Deklaratat u bënë para një takimi me liderë evropianë dhe përfaqësues të industrisë në Antwerp, në prag të samitit të BE-së ku do të diskutohet forcimi i konkurrueshmërisë dhe rimëkëmbja ekonomike e bllokut.
