Presidenti i Francës, Emmanuel Macron, ka paralajmëruar se Evropa mund të “zhduket” brenda pesë viteve nëse nuk vepron për t’u bërë pjesëmarrëse aktive në zhvillimet globale, duke lënë pas rolin e një vëzhguesi pasiv.
Sipas Makronit, zgjedhja për të qëndruar mënjanë çon drejt një nënshtrimi të heshtur, ku Evropa përpiqet të mos prishë ekuilibrat, sillet me kujdes ndaj Shteteve të Bashkuara dhe vazhdon marrëdhëniet me Kinën pa ndryshime thelbësore. Ai theksoi se një qasje e tillë është e rrezikshme dhe se mungesa e veprimit do të ketë pasoja serioze për të ardhmen e kontinentit.
Makron kujtoi se Evropa historikisht ka dështuar sa herë ka qenë e ngadaltë dhe e përçarë. Si shembull, ai përmendi krizën financiare globale, e cila nisi në SHBA, por u ndje shumë më rëndë në Evropë për shkak të reagimit të vonuar dhe mungesës së unitetit. Ndërsa amerikanët reaguan shpejt dhe në mënyrë të koordinuar, vendet evropiane u përballën me pasoja afatgjata dhe të pabarabarta mes veriut dhe jugut, duke u dashur pesë deri në dhjetë vjet për ta kapërcyer krizën.
Si shembull pozitiv, Makron theksoi reagimin e përbashkët evropian gjatë pandemisë së COVID-19 në vitin 2020, kur u krijua një borxh i përbashkët prej 750 miliardë eurosh. Fillimin e luftës në Ukrainë ai e cilësoi si një tronditje të paprecedentë që e goditi Evropën në mënyrë të barabartë.
Duke komentuar deklaratat dhe kërcënimet e presidentit amerikan Donald Trump lidhur me Groenlandën, Makron tha se askush nuk e di se deri ku janë të gatshme të shkojnë Shtetet e Bashkuara, duke nënvizuar edhe një herë nevojën urgjente që Evropa të forcojë rolin e saj në skenën ndërkombëtare.
