Sistemi “Qyteti i Sigurt” (Safe City) pritet të nisë së shpejti funksionimin edhe në Ohër dhe Strugë, me instalimin e 40 kamerave të trafikut që do të evidentojnë shkeljet rrugore dhe do të kontribuojnë në rritjen e disiplinës në komunikacion.
Një pjesë e infrastrukturës tashmë është vendosur në terren. Katër kamera janë instaluar në autostradën Ohër–Kërçovë, në afërsi të Gorencit dhe Trebenishtës, si dhe pranë Botunit dhe Novo Sellës në zonën e Debrcës. Aktualisht, kamerat nuk vendosin sanksione, pasi sistemi ndodhet në fazën e testimit teknik dhe verifikimit të pajisjeve.
Nga SPB Ohër bëjnë të ditur se qëllimi kryesor është ulja e shkeljeve dhe aksidenteve të trafikut, veçanërisht gjatë periudhave me ngarkesë të lartë të qarkullimit dhe rrezik të shtuar nga drejtimi i pakujdesshëm, parkimi i paligjshëm dhe tejkalimi i shpejtësisë në autostrada dhe hyrje të zonave turistike.
Projekti “Qyteti i Sigurt” është zbatuar tashmë në Shkup, Kumanovë dhe Tetovë, ku gjobat kanë nisur më 1 shkurt 2026, pas një periudhe testimi që filloi më 1 dhjetor 2025. Sipas autoriteteve, sistemi do të zgjerohet gradualisht në të gjithë vendin, në varësi të vendndodhjes dhe llojit të shkeljeve.
Qytetarët paralajmërohen se kamerat do të bëhen aktive pas përfundimit të testimeve dhe lansimit zyrtar, ndërsa pikat me rrezik më të lartë do të jenë ato me trafik tradicionalisht të dendur. Nga SPB theksojnë se, përveç teknologjisë, transparenca është thelbësore, përfshirë informimin mbi vendndodhjen e kamerave, shkeljet e sanksionuara, kalibrimin e pajisjeve dhe mbrojtjen e të dhënave personale.
